అల్లు ఇంటి వద్ద వంగపండు ధర్నా

హైదరాబాద్: అనుమతి లేకుండా తన పాటను మగధీర సినిమాలో వాడుకోవడాన్ని నిరసిస్తూ ప్రముఖ విప్లవ కవి వంగపండు ప్రసాదరావు నిర్మాత అల్లు అరవింద్ ఇంటి ముందు సోమవారం ధర్నా చేశారు. ఇతర కళాకారులతో కలిసి ఆయన ధర్నా నిర్వహించారు. ఇంటి ముందు ప్రదర్శన కూడా ఇచ్చారు. మగధీరలో తన పాటను వాడుకున్నందుకు, ముఖ్యంగా స్ఫూర్తిదాయకమైన పాటను అశ్లీల సన్నివేశంలో పెట్టినందుకు నిర్మాత క్షమాపణ చెప్పాలని వంగపండు డిమాండ్ చేశారు. తమ డిమాండ్లను అంగీకరించే వరకు ఉద్యమాన్ని సాగిస్తామని ఆయన చెప్పారు.

తమ మూడు డిమాండ్లను అంగీకరించే వరకు ఉద్యమం సాగిస్తామని ఆయన చెప్పారు. చర్చల కోసం తన వద్దకు అల్లు అరవింద్ మధ్యవర్తిని పంపారని, అయితే అప్పటికే సినీ నిర్మాత వైఖరిపై ఉద్యమం చేయడానికి ఒక కమిటీ ఏర్పడిందని, కమిటీ మూడు డిమాండ్లను సూత్రీకరించిందని, ఆ డిమాండ్లను అంగీకరించే వరకు ఉద్యమం సాగుతుందని ఆయన వివరించారు. నిర్మాత పాటను తొలగించకపోతే చట్టప్రకారం చర్యలు తీసుకుంటామని ఆయన చెప్పారు.

ధర్నా సందర్భంగా అల్లు అరవింద్ కు చెందిన వ్యక్తులు ధర్నా చేస్తున్న కళాకారులతో వివాదానికి దిగారు. ఇరు వర్గాల మధ్య తీవ్ర వాగ్వివాదం చెలరేగింది. చేతులు వేసుకునే వరకు పరిస్థితి వెళ్లింది.