చిరు పార్టీపై నమ్మకం లేదు: సీతారాం

శ్రీకాకుళం: చిరంజీవి నేతృత్వంలోని ప్రజారాజ్యం పార్టీ బలం సంతరించుకుంటుందనే నమ్మకం పోయిందని ఆ పార్టీ నాయకుడు తమ్మినేని సీతారాం అన్నారు. ఆయన ప్రజారాజ్యం పార్టీకి రాజీనామా చేసి తెలుగుదేశం పార్టీలో చేరుతున్నట్లు వార్తలు వస్తున్నాయి. ప్రజారాజ్యం పార్టీ నుంచి తప్పుకునే విషయాన్ని ఆయన ధృవీకరించినప్పటికీ తెలుగుదేశం పార్టీలో చేరే విషయాన్ని అధికారికంగా వెల్లడించలేదు. ప్రజారాజ్యం పార్టీ కాంగ్రెసుకు అనుకూలంగా వ్యవహరిస్తోందనే వాతావరణం బలపడిపోయిందని ఆయన ఒక ప్రైవేట్ టీవీ చానెల్ ప్రతినిధితో అన్నారు.

జీవిత కాలమంతా మీరే ఏలుకోండి అని చిరంజీవి శాసనసభలో కాంగ్రెసు నాయకులతో అనడం ప్రజారాజ్యం పార్టీ ఏమిటో తెలియజేస్తోందని ఆయన వ్యాఖ్యానించారు. కాంగ్రెసుకే అధికారం ఇచ్చినప్పుడు పార్టీ పెట్టాల్సిన అవసరం ఏముందని ఆయన చిరంజీవిని ప్రశ్నించారు. బలోపేతం చేయడానికి అవకాశాలున్నాయని, అయితే ప్రజారాజ్యం పార్టీ బలోపేతానికి ఇష్టం లేనట్లు వ్యవహరిస్తోందని ఆయన అన్నారు. ఏ పార్టీలో చేరాలనే విషయంపై కార్యకర్తలతో మాట్లాడి నిర్ణయం తీసుకుంటానని ఆయన చెప్పారు.