టిడిపి, కాంగ్రెసు ఎమ్మెల్యేల వాగ్వాదం

హైదరాబాద్: శాసనసభ ఆవరణలోని మీడియా పాయింట్ వద్ద కాంగ్రెసు, తెలుగుదేశం శాసనసభ్యులు పరస్పరం ఘర్షణకు దిగారు. మాటల తూటాలు విసురుకున్నారు. రౌడీలా వ్యవహరిస్తున్నావంటూ ముఖ్యమంత్రి డాక్టర్ వైయస్ రాజశేఖర రెడ్డి తెలుగుదేశం శాసనసభ్యుడు ఎర్రబెల్లి దయాకర రావుపై చేసిన వ్యాఖ్య సభలో దుమారం రేపింది. దీంతో సభ పది నిమిషాల పాటు వాయిదా పడింది. సభ వాయిదా పడిన తర్వాత మీడియా పాయింట్ వద్దకు చేరుకున్న ఇరు పార్టీల సభ్యులు పరస్పరం వాగ్వివాదానికి దిగారు. సభ వాయిదాకు మీరంటే మీరు కారణమంటూ విమర్శలు చేసుకున్నారు.

తెలుగుదేశం సభ్యులు సభలో రౌడీల్లా వ్యవహరిస్తున్నారని కాంగ్రెసు శాసనసభ్యులు వ్యాఖ్యానించారు. ఎవరు ఎప్పుడు దాడి చేస్తారో తెలియడం లేదని వారన్నారు. గన్ మెన్ ఉంటే తప్పు సభలోకి రాలేని పరిస్థితి నెలకొని ఉందని వారు తెలుగుదేశం సభ్యులపై విరుచుకు పడ్డారు. దానికి తెలుగుదేశం సభ్యులు ఘాటుగా సమాధానమిచ్చారు. ముఖ్యమంత్రి గూండాలా, రౌడీలా వ్యవహరిస్తున్నారని తెలుగుదేశం సభ్యులు విమర్శించారు.