ఎర్రబెల్లి రాజీనామా డ్రామా: సురేఖ

కడప: శాసనసభ సభ్యత్వానికి తెలుగుదేశం శాసనసభ్యుడు ఎర్రబెల్లి దయాకర రావు చేసిన రాజీనామాను రాష్ట్ర మహిళా శిశు సంక్షేమ మంత్రి కొండా సురేఖ ఒక డ్రామాగా అభివర్ణించారు. ఆమోదించడానికి వీలు లేకుండా దయాకర రావు రాజీనామా లేఖను సమర్పించారని ఆమె గురువారం శాసనసభ ఆవరణలోని మీడియా పాయింట్ లో విమర్శించారు చిత్తుశుద్ధి ఉంటే రాజీనామా లేఖను సరైన రీతిలో సమర్పించాలని ఆమె సవాల్ చేశారు. రాజీనామా విషయంలో దయాకరరావుది మొసలి కన్నీరు అని ఆమె అన్నారు.

చేతనైతే శాసనసభ సభ్యత్వానికి నిజంగా రాజీనామా చేసి తనపై పోటీ చేసి గెలవాలని ఆమె దయాకరరావుకు సవాల్ విసిరారు. తన మరిది ఇంట్లో అక్రమంగా నిల్వ ఉంచిన కందులు దొరికాయని ఒక పత్రికలో వచ్చిన వార్తను ఆమె ఖండించారు. ముఖ్యమంత్రి డాక్టర్ రాజశేఖర రెడ్డి తనను రౌడీలా వ్యవహరిస్తున్నావని అన్నందుకు మనస్తాపానికి గురైన ఎర్రబెల్లి దయాకరరావు బుధవారం శాసనసభ సభ్యత్వానికి రాజీనామా చేస్తూ లేఖను స్పీకర్ కిరణ్ కుమార్ రెడ్డికి సమర్పించారు. వరంగల్ జిల్లాలో కొండా సురేఖ, దయాకర రావుల మధ్య గత కొంత కాలంగా ఆధిపత్య పోరు సాగుతోంది.