మావోల నేత రామకృష్ణ అరెస్టు?

హైదరాబాద్: మావోయిస్టు అగ్రనేతలు రామకృష్ణ, సుధాకర్ పోలీసుల అదుపులో ఉన్నట్లు వార్తలు వస్తున్నాయి. రామకృష్ణతో పాటు సుధాకర్ అనే మరో నేతను కూడా పోలీసులు అరెస్టు చేసినట్లు ప్రచారం జరుగుతోంది. ఎలక్ట్రానిక్ మీడియాలోనూ, ప్రింట్ మీడియాలోనూ ఈ మేరకు వార్తలు వచ్చాయి. గురువారం అర్థరాత్రి నుంచి ఈ వార్తలు ప్రచారంలో ఉన్నాయి. వారిద్దరితో పాటు ఆంధ్రా - ఒరిస్సా సరిహద్దు కమిటీ కార్యదర్శి దయా కూడా అరెస్టయినట్లు చెబుతున్నారు.

మల్కాన్ గిరి జిల్లా పొదిలిలో వారిని అదుపులోకి తీసుకున్నట్లు చెబుతున్నారు. రెండు రోజుల క్రితం ఇదే ప్రాంతంలో ముగ్గుర మహిళా నక్సలైట్లు హతమయ్యారు. పొదిలిలో జరిగే మావోయిస్టు పార్టీ ప్లీనరీ సమావేశానికి అగ్రనేతలు వచ్చినట్లు సమాచారం అందుకున్న పోలీసులు వారిని చుట్టుముట్టినట్లు చెబుతున్నారు. అయితే ఈ వార్తలను విజయనగరం జిల్లా ఎస్పీ వై. గంగాధర్ ఖండిస్తున్నారు. తమ అదుపులో మావోయిస్టు అగ్రనేతలు లేరని ఆయన చెబుతున్నారు. కాగా, అరెస్టు చేసిన మావోయిస్టు అగ్రనేతలను కోర్టు హాజరు పరచాలని విప్లవ రచయితల సంఘం (విరసం) నేత వరవరరావు డిమాండ్ చేశారు.