రోశయ్య, బాబు: మాటకు మాట

హైదరాబాద్: కర్ణాటక, మహారాష్ట్ర ప్రభుత్వాలు అక్రమంగా నిర్మిస్తున్న సాగునీటి ప్రాజెక్టులపై ఆర్థిక మంత్రి కె. రోశయ్య, తెలుగుదేశం పార్టీ అధ్యక్షుడు నారా చంద్రబాబు నాయుడులకు మధ్య సోమవారం శాసనసభలో ఆసక్తికరమైన చర్చ జరిగింది. పొరుగు రాష్ట్రాల అక్రమాలను అడ్డుకోవడానికి పోరాటాలు చేద్దామని చంద్రబాబు అన్నారు. కర్ణాటక రాష్ట్ర నిర్మిస్తున్న ప్రాజెక్టులు అక్రమమని ఎలా చెప్పగలం, ఈ విషయంలో కేంద్ర జోక్యం చేసుకోదు అని కేంద్ర న్యాయ శాఖ మంత్రి వీరప్ప మొయిలీ అనడాన్ని ఆయన గుర్తు చేశారు. న్యాయశాఖా మంత్రిగా న్యాయం చేయాల్సిన బాధ్యత వీరప్ప మొయిలీపై ఉందని, కర్ణాటక తరఫున మొయిలీ మాట్లాడితే మనం మాట్లాడాల్సిన అవసంర లేదని, కేంద్ర న్యాయశాఖా మంత్రిగా మనకు న్యాయం చేయాలని అడుగుదామని రోశయ్య చెప్పారు.

పొరుగు రాష్ట్రాల అక్రమ ప్రాజెక్టులు అడ్డుకోవడానికి ప్రభుత్వం చేపట్టే చర్యలకు తాము అన్ని విధాలుగా సహకరిస్తామని చంద్రబాబు అన్నారు. నిర్మాణాత్మకంగా వ్యవహరించి, అందరం వెళ్లి కేంద్ర ప్రభుత్వానికి విజ్ఞప్తి చేయడానికి వ్యూహం ఖరారు చేస్తామని మంత్రి చెప్పారు. అన్ని పార్టీలవాళ్లం వెళ్లి ఢిల్లీలో ధర్నా చేద్దామని చంద్రబాబు సూచించారు. వీధి పోరాటాలు చేద్దామంటే తమకేమీ అభ్యంతరం లేదని, అయితే వీధిపోరాటాల వల్ల, దీక్షల వల్ల సమస్య పరిష్కారం అవుతుందని అనుకోవడం లేదని రోశయ్య అన్నారు.