సభలో సత్తా చుపుతాం: చిరు

హైదరాబాద్: వచ్చే శాసనసభ సమావేశాల్లో ప్రజారాజ్యం పార్టీ తన సత్తా ఏమిటో చూపించనుందని ఆ పార్టీ అధినేత చిరంజీవి వ్యాఖ్యానించారు. శాసనసభకు తాను కొత్త అయినందున ఇప్పుడు పరిశీలన (అబ్జర్వ్‌), ఆకళింపు (అబ్జార్బ్‌) పనిలో ఉన్నానని అన్నారు. సోమవారం శానససభ లాబీల్లోని పీఆర్‌ఎల్పీ కార్యాలయంలో తనను కలసిన విలేఖరులతో ఆయన ఇష్టాగోష్ఠిగా మాట్లాడారు.

అవసరం లేకపోయినా ప్రతి అంశంపై మాట్లాడాలనే ధోరణి తమకు లేదన్నారు. సోమవారం శాసనసభలో బాబ్లీ అంశంపై మాట్లాడేందుకు ప్రయత్నించగా తమ సభ్యులకు అవకాశం రాలేదని చెప్పారు. రెండు రాష్ట్రాల మధ్య సమస్యగా ఉన్న బాబ్లీ అంశాన్ని..శాసనసభలో రెండు పార్టీల సమస్యగా మార్చేశారని విమర్శించారు. చాలా మంది కొత్త ఎమ్మెల్యేలు కూడా సభలో బాగా మాట్లాడుతున్నారని, వారు సభకు కొత్త అయినా రాజకీయాల్లో ఎప్పటి నుంచో ఉన్నారని అన్నారు.