రఘువీరా రెడ్డి వ్యాఖ్యలపై దుమారం

హైదరాబాద్: వ్యవసాయ శాఖ మంత్రి రఘువీరా రెడ్డి తెలుగుదేశం పార్టీ అధ్యక్షుడు నారా చంద్రబాబు నాయుడిపై, ఆ పార్టీపై చేసిన వ్యాఖ్యలు బుధవారం శాసనసభలో తీవ్ర గందరగోళానికి దారి తీశాయి. రఘువీరా రెడ్డి వ్యాఖ్యలపై తెలుగుదేశం సభ్యులు తీవ్ర నిరసన వ్యక్తం చేశారు. స్పీకర్ పోడియాన్ని చుట్టుముట్టారు. దీంతో సభను సభాధ్యక్ష స్థానంలో కూర్చున్న డిప్యూటీ స్పీకర్ నాదెండ్ల మనోహర్ అర్థాంతరంగా రేపటికి వాయిదా వేశారు. దీన్ని నిరసిస్తూ తెలుగుదేశం సభ్యులు చాలా సేపు సభలోనే కూర్చున్నారు. ఆ తర్వాత సభ వెలుపలికి వచ్చారు. తమ పార్టీ శాసనసభ్యులతో చంద్రబాబు భవిష్యత్తు వ్యూహంపై చర్చించడానికి సమావేశమయ్యారు.

రఘువీరా రెడ్డి తన వ్యాఖ్యలు ఉపసంహరించుకోవాలని తెలుగుదేశం సభ్యులు డిమాండ్ చేశారు. మంత్రి వ్యాఖ్యలను రికార్డుల నుంచి తొలగిస్తున్నట్లు నాదెండ్ల మనోహర్ చెప్పారు. వ్యాఖ్యలను ఉపసంహరించుకోవాల్సిందిగా ఆయన మంత్రికి సూచించారు. ఆ సూచనను పట్టించుకోకుండా వైయస్ రాజశేఖర రెడ్డి అధికారంలోకి వస్తే రాష్ట్రం సుభిక్షంగా ఉంటుందని, ఇతరులు వస్తే దుర్భిక్షం వస్తుందని ప్రజలు నమ్ముతున్నారని మంత్రి అన్నారు. మంత్రి తన వ్యాఖ్యలను ఉపసంహరించుకోవాల్సిందేనని తెలుగుదేశం సభ్యులు పట్టుబడుతూ సభా కార్యక్రమాలను స్తంభింపజేశారు.

కరువుపై జరిగిన చర్చకు సమాధానమిస్తూ రఘువీరా రెడ్డి ఆ వ్యాఖ్యలు చేశారు. అంతకు ముందు ప్రతిపక్ష నాయకుడు నారా చంద్రబాబు నాయుడు మాట్లాడుతూ మంత్రి రాష్ట్రంలో పర్యటించకుండా ఉపన్యాసాలు ఇస్తున్నారని వ్యాఖ్యానించారు. రఘువీరా రెడ్డి కరవు సహాయక చర్యలకు సంబంధించి లెక్కలు చెప్పాలని ఆయన డిమాండ్ చేశారు. కరవుపై చర్చకు నిర్దిష్టంగా సమాధానం చెప్పాలని ఆయన డిమాండ్ చేశారు. మంత్రి అనిర్దిష్టంగా ప్రసంగం చేస్తున్నారని ఆయన అభిప్రాయపడ్డారు.