నా వంతు ఎప్పుడో: చిరు

హైదరాబాద్: పార్టీ మారుతారంటూ వచ్చే వార్తల్లో తన వంతు ఎప్పుడు వస్తుందో అని ప్రజారాజ్యం పార్టీ అధినేత చిరంజీవి మీడియా కథనాలపై వ్యంగ్యంగా అన్నారు. పార్టీని వీడుతారంటూ తమ నేతలపై వస్తున్న వార్తలపై ఆయన బుధవారం ఉదయం మీడియా ప్రతినిధుల వద్ద ఆ విధంగా స్పందించారు. తాను కూడా పార్టీ మారుతానని వార్తలు రాస్తారేమోనని ఆయన అన్నారు. పార్టీ మారుతారంటూ రోజుకో జిల్లా నేతపై వార్తలు రాస్తారని, తమ పార్టీ నేతలు ఎవరూ వెళ్లిపోరని ఆయన అన్నారు.

తమ పార్టీని బలహీన పరచడానికి చాలా మంది ప్రయత్నిస్తున్నారని ఆయన విమర్శించారు. తమ పార్టీనేతలెవరూ వెళ్లిపోరని, ప్రజలు తన వెంటే ఉన్నారని ఆయన అన్నారు. తాను ఒక్కసారి రాష్ట్రంలో పర్యటిస్తే చరిత్రే మారిపోతుందని ఆయన అన్నారు. వచ్చే నాలుగున్నరేళ్లలో పార్టీని నెంబర్ వన్ గా తీర్చి దిద్దుతానని ఆయన అన్నారు. శాసనసభలో గతం గురించే చర్చ జరుగుతోందని, వర్తమానం, భవిష్యత్తు గురించి చర్చ జరగడం లేదని ఆయన అన్నారు.