ధర్మానపై నారాయణ మండిపాటు

తిరుపతి: రాష్ట్రంలో కరవు పరిస్థితిపై రెవెన్యూ మంత్రి ధర్మాన ప్రసాదరావు చేసిన ప్రకటనపై సిపిఐ రాష్ట్ర కార్యదర్శి కె.నారాయణ తీవ్రంగా మండిపడ్డారు. స్వయంగా మంత్రి నియోజకవర్గంలోనే కరవు తాండవిస్తోందని ఆయన బుధవారం తిరుపతిలో మీడియా ప్రతినిధుల సమావేశంలో అన్నారు. రాష్ట్రంలోని దుర్భిక్ష పరిస్థితులపై ఏ మంత్రికి కూడా చిత్తశుద్ధి లేదని ఆయన విమర్శించారు. ప్రభుత్వ తీరు గురవింద గింజ సామెతలాగా ఉందని ఆయన అన్నారు. ప్రభుత్వ విధానాల వల్లనే రైతులు ఆత్మహత్యలకు పాల్పడుతున్నారని ఆయన అన్నారు.

అఖిల భారత వ్యవసాయ కార్మిక సంఘం జాతీయ సమావేశాలు తిరుపతిలో జరుగుతాయని ఆయన చెప్పారు. ఈ నెల 25, 26, 27 తేదీల్లో జరిగే ఈ సమావేశాలకు సిపిఐ జాతీయ ప్రధాన కార్యదర్శి బర్దన్ తో పాటు అఖిల భారత వ్యవసాయ కార్మిక సంఘం ముఖ్యనేతలంతా హాజరవుతారని ఆయన చెప్పారు.