కాంగ్రెస్ లో విలీనం ఉండదు: పవార్

న్యూఢిల్లీ: తమ పార్టీని కాంగ్రెసులో విలీనం చేసే ప్రసక్తి లేదని ఎన్సీపి నేత, కేంద్ర వ్యవసాయ శాఖ మంత్రి శరద్ పవార్ స్పష్టం చేశారు. ఈ విషయంలో కాంగ్రెసు పార్టీ చౌకబారు ప్రకటనలు చేస్తోందని ఆయన అన్నారు. ఇప్పుడు కాంగ్రెసు పార్టీ ఆ విషయాలను ఎందుకు ప్రస్తావిస్తోందో అర్థం కావడం లేదని, ఇతర పార్టీల గురించి ఆ పార్టీ ఆ విధంగా ఎందుకు మాట్లాడడం లేదని, కాంగ్రెసు పార్టీ తమ పార్టీలో విలీనం కావాలని తానంటే ఎలా ఉంటుందని ఆయన అన్నారు.

తమ పార్టీ విలీనమయ్యే విషయాన్ని ఎన్సీపి పరిగణనలోకి తీసుకోవాలని ఎఐసిసి ప్రధాన కార్యదర్శి దిగ్విజయ్ సింగ్, కేంద్ర మంత్రి విలాస్ రావు దేశ్ ముఖ్ చేసిన ప్రకటనలపై ఆయన బుధవారం తీవ్రంగా ప్రతిస్పందించారు. అవి ప్రచారం కోసం చేసే చౌకబారు ప్రకటనలని ఆయన కొట్టి పారేశారు. అంతకన్నా తానేమీ చెప్పలేనని ఆయన అన్నారు. వారు అలా అనాల్సి ఉండింది కాదని, ప్రజాజీవనంలో ఉన్నవారు రాజకీయ నాయకులు కొన్ని విషయాలు మాట్లాడితే అర్థం చేసుకోవచ్చునని, ప్రధానమైన విషయాలను బహిరంగంగా మాట్లాడేవారు ప్రచారాన్ని ఆశిస్తున్నారని అనుకోవాల్సి ఉంటుందని, అంతకు మించి వారి ప్రకటనలకు ప్రాధాన్యం లేదని ఆయన అన్నారు.

మహారాష్ట్ర తీవ్రమైన కరవును ఎదుర్కుంటున్న సమయంలో కాంగ్రెసు, ఎన్సీపి కలిసి పనిచేయాల్సిన అవసరం ఉందని, ఎన్నికల్లో కాంగ్రెసు కలిసి వస్తే సంతోషమని, కలిసి రాకపోయినా ఫరవా లేదని ఆయన అన్నారు. ప్రతి రాజకీయ పార్టీ తన సొంత నిర్ణయాన్ని తీసుకోవాలని ఆయన అన్నారు.