వైయస్ వివరణకు బాబు పట్టు

హైదరాబాద్: కరవు చర్చకు ముఖ్యమంత్రి డాక్టర్ వైయస్ రాజశేఖర రెడ్డి ఇచ్చిన సమాధానానికి వివరణలు ఈరోజే ఇవ్వాలని ప్రతిపక్ష నాయకుడు నారా చంద్రబాబు నాయుడు గురువారం శాసనసభలో పట్టుబట్టారు. కరవుపై చర్చకు సమాధానం ఇచ్చిన తర్వాత సభను రేపటికి వాయిదా వేయాలని ముఖ్యమంత్రి స్పీకర్ కిరణ్ కుమార్ రెడ్డికి సూచించారు. సమయం చాలా దాటిపోయినందున సభ్యుల సందేహాలకు రేపు కావాల్సినంత సమయం ఇస్తానని వైయస్ చెప్పారు. అయితే వివరణలు ఈ రోజే కావాలని చంద్రబాబు పట్టుబట్టారు.

సభా నాయకుడు సూచించినందున సభను వాయిదా వేయడం సంప్రదాయమని స్పీకర్ చెప్పినా చంద్రబాబు వినలేదు. చంద్రబాబు మాట్లాడుతుండగా వైయస్ రాజశేఖర రెడ్డి వెళ్లిపోవడానికి అన్నట్లుగా నిలబడే ఉన్నారు. ముఖ్యమంత్రి కూర్చోవాలని చంద్రబాబు పదే పదే సూచించడం మొదలు పెట్టారు. ఈ సమయంలో సభను అర్థాంతరంగా స్పీకర్ రేపటికి వాయిదా వేశారు. దీన్ని నిరసిస్తూ తెలుగుదేశం సభ్యులు కొద్దిసేపు స్పీకర్ పోడియం వద్ద బైఠాయించారు.