టిడిపి రభస: అసెంబ్లీ వాయిదా

హైదరాబాద్: గురువారం శాసనసభలో తమ పార్టీ నాయకుడు నారా చంద్రబాబు నాయుడిని మాట్లాడనివ్వకపోవడాన్ని నిరసిస్తూ తెలుగుదేశం శాసనసభ్యులు శుక్రవారం ఆందోళనకు దిగారు. దీంతో సభను స్పీకర్ కిరణ్ కుమార్ రెడ్డి పది నిమిషాలు వాయిదా వేశారు. కరవుపై చర్చ అనంతరం బుధవారం ముఖ్యమంత్రి వైయస్ రాజశేఖర రెడ్డి గురువారం సమాధానమిచ్చారు. ఆ తర్వాత చంద్రబాబు ముఖ్యమంత్రి వివరణ కోసం పట్టుబట్టారు. అయితే స్పీకర్ అర్థాంతరంగా సభను వాయిదా వేశారు.

స్పీకర్ తీరును నిరసిస్తూ తెలుగుదేశం సభ్యులు గురువారం సభలోనే కొద్ది సేపు నిరసన తెలిపారు. ఆ సంఘటనపై తెలుగుదేశం సభ్యులు శుక్రవారం ఉదయం ఆందోళనకు దిగారు. తెలుగుదేశం సభ్యులు తమ ఆందోళనను విరమించుకోకపోవడంతో స్పీకర్ సభను పది నిమిషాల పాటు వాయిదా వేశారు. ఆ తర్వాత సభ తిరిగి ప్రారంభమైంది. అంతకు ముందు ప్రతిపక్షాలు ప్రతిపాదించిన వాయిదా తీర్మానాలను స్పీకర్ తిరస్కరించారు.