మీడియా కాదు, ప్రజలు: చిరు

హైదరాబాద్: పార్టీ భవిష్యత్తును నిర్ణయించేది ప్రజలే గాని మీడియా కాదని ప్రజారాజ్యం పార్టీ అధినేత చిరంజీవి అన్నారు. తన పుట్టిన రోజు సందర్భంగా ఆయన శనివారం మీడియా ప్రతినిధుల సమావేశంలో మాట్లాడారు. రాజకీయాలను మీడియా శాసించాలని చూస్తోందని, అది సరైన పద్ధతి కాదని ఆయన అన్నారు. జెండాను నిలబెడదామనే నినాదంతో పార్టీని పటిష్టం చేయనున్నట్లు ఆయన తెలిపారు. జెండాను నిలబెడదామనే నినాదంతో ఈ నెల 26వ తేదీన పండుగ చేసుకోవాలని ఆయన పార్టీ కార్యకర్తలకు పిలుపునిచ్చారు.

రాజకీయాల్లోకి వచ్చాక తన బాధ్యత పెరిగిందని ఆయన చెప్పారు. సింగిల్ టేకింగ్ అనేది రాజకీయంలో ఉండదని, సింగిల్ టేక్ రాజకీయాలు కొత్తగా ఉన్నాయని ఆయన అన్నారు. తనకు రాజకీయ జీవితం సంతృప్తి ఇచ్చిందని ఆయన చెప్పారు. పార్టీ శ్రేణులు ఉత్సహంగా ఉన్నాయని ఆయన చెప్పారు. ప్రజా ఉద్యమమే తమ పార్టీ ఎజెండా అని ఆయన అన్నారు.

శనివారం ఉదయం జన్మ దినం సందర్భంగా చిరంజీవిని వేదపండితులు ఆశీర్వదించారు. ఇంతకు ముందు తాను సినీ ప్రముఖులు, అభిమానుల మధ్యనే జన్మదినం జరుపుకునే వాడినని, ఇప్పుడు ప్రజలందరి మధ్య నిర్వహించుకుంటున్నానని ఆయన చెప్పారు. ఇక ప్రజారాజ్యం పార్టీకి అన్నీ శుభాలే అని ఆయన అన్నారు. తన జన్మదినాన్ని అభిమానులు నిరాడంబరంగా జరుపుకోవాలని ఆయన కోరారు. ఈ జన్మదినం తనపై మరింత బాధ్యతను పెంచిందని ఆయన చెప్పారు.