రాహుల్ పేర నకిలీ డ్రైవింగ్ లైసెన్స్

పాట్నా: కాంగ్రెస్ ప్రధాన కార్యదర్శి రాహుల్ గాంధీ పేర బీహార్ రాష్ట్రంలోని సరాన్ జిల్లాలో నకిలీ డ్రైవింగ్ లైసెన్స్ జారీ అయిది. ఈ విషయాన్ని అధికారులు సోమవారం వెల్లడించారు. వారం క్రితం వరకు జిల్లా అధికారులకు విషయం తెలియలేదు. రాహుల్ పేర ఈ ఏడాది మే 18వ తేదీన జిల్లా రవాణాధికారి పునీత శ్రీవాస్తవ డ్రైవింగ్ లైసెన్స్ ను జారీ చేసినట్లు జిల్లా అధికారులు చెప్పారు.

అధికారులు ఇచ్చిన వివరాల ప్రకారం - ఆ లైసెన్స్ 2022 మే 17వ తేదీ వరకు చెల్లుతుంది. దానిపై రాహుల్ తండ్రి పేరు సరిగానే రాజీవ్ గాంధీ అని ఉంది. శాశ్వత చిరునామా న్యూఢిల్లీలోని సంసద్ మార్గ్ ఉంది. అయితే ఆ లైసెన్స్ పై రాహుల్ గాంధీ చిత్రం లేదు. మరో యువకుడి ఫొటో ఉంది. తాను ఆ లైసెన్స్ ను జారీ చేయలేదని శ్రీవాస్తవ అంటున్నాడు. తనను అప్రతిష్ట పాలు చేయడానికి గతంలో కూడా ఇటువంటి నకిలీ డ్రైవింగ్ లైసెన్లు జారీ చేసినట్లు అతను చెబుతున్నాడు. గతంలో 1990 దశకంలో ఎల్టీటిటిఇ నాయకుడు వి ప్రభాకరన్ పేరు మీద డ్రైవింగ్ లైసెన్స్ జారీ అయింది.