అసెంబ్లీ: ప్రతిపక్షాల వాకౌట్

హైదరాబాద్: ఇందిరమ్మ గృహాల్లో అక్రమాలపై ప్రభుత్వం సభా సంఘం వేయడానికి నిరాకరించినందుకు నిరసనగా ప్రతిపక్షాలు సోమవారం శాసనసభ నుంచి వాకౌట్ చేశాయి. తెలుగుదేశం, ప్రజారాజ్యం, సిపిఐ, సిపిఎం, తెలంగాణ రాష్ట్ర సమితి సభ్యులు వాకౌట్ చేశారు. లోకసత్తా సభ్యుడు జయప్రకాష్ నారాయణ నిరసన వ్యక్తం చేశారు. ఇందిరా ఆవాస్ యోజన కింద నిధులను తన పథకానికి రాష్ట్ర ప్రభుత్వం మళ్లించుకుందని, రాష్ట్ర ప్రభుత్వం పేదలకు ఇళ్లు నిర్మించిన దాఖలాలు లేవని, దీని వల్ల ఎస్సీ, ఎస్టీలకు అన్యాయం జరుగుతోందని ప్రతిపక్ష నాయకుడు నారా చంద్రబాబు నాయుడు విమర్శించారు. ప్రభుత్వ తీరుకు నిరసనగా తాము సభ నుంచి వాకౌట్ చేస్తున్నట్లు ఆయన ప్రకటించారు.

ఇందిరమ్మ గృహాల విషయంలో ప్రభుత్వ తీరును విమర్శిస్తూ ప్రజారాజ్యం పార్టీ సభ నుంచి వాకౌట్ చేసింది. బడుగులకు, వికలాంగులకు ప్రభుత్వ విధానం వల్ల గృహ నిర్మాణ పథకంలో అన్యాయం జరుగుతోందని తెలంగాణ రాష్ట్ర సమితి (తెరాస) సభ్యుడు హరీష్ రావు విమర్శించారు. సిపిఎం శాసనసభా పక్ష నాయకుడు జూలకంటి రంగారెడ్డి, సిపిఐ శాసనసభా పక్షం నాయకుడు మల్లేష్ ప్రభుత్వ తీరుకు నిరసనగా తాము సభ నుంచి వాకౌట్ చేస్తున్నట్లు ప్రకటించారు.