బాబుకు కడుపు మంట: వైయస్

హైదరాబాద్: తమ ప్రభుత్వం పనిచేస్తుంటే తెలుగుదేశం పార్టీ అధ్యక్షుడు నారా చంద్రబాబు నాయుడికి కడుపు మంటగా ఉందని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. ఇందిరా ఆవాస్ యోజన కింది నిధుల మళ్లింపుపై చెంద్రబాబు చేసిన ఆరోపణలపై ఆయన సోమవారం శాసససభలో తీవ్రంగా ప్రతిస్పందించారు. వర్షం పడితే, పంటలు బాగా పండితే చంద్రబాబుకు కడుపు మంట అని ఆయన అన్నారు. చంద్రబాబుకు, తెలుగుదేశం నాయకులకు ఈర్ష్య, దుగ్ధ అని ఆయన వ్యాఖ్యానించారు.

అక్రమాలు ఏవైనా ఉంటే నిర్దిష్టంగా తమ దృష్టికి తెస్తే చర్యలు తీసుకంటామని ముఖ్యమంత్రి అంతకు ముందు హామీ ఇచ్చారు. అయితే సభా సంఘం వేయాలని చంద్రబాబు డిమాండ్ చేశారు. దీనిపై ముఖ్యమంత్రి తీవ్రంగా ప్రతిస్పందించారు. తాము సాగునీటి ప్రాజెక్టులు కడతామంటే ప్రతిపక్షాలు కోర్టుకెక్కాయని ఆయన అన్నారు. ఇందిరా ఆవాస్ యోజన కింద 11 లక్షల ఇళ్లు కట్టామని, 45 లక్షల ఇళ్లు కట్టి వాటిలో 11 లక్షలు ఆవాస్ యోజన కింద చూపిస్తే తప్పేమిటని ఆయన అన్నారు. తెలుగుదేశం తన ప్రభుత్వ హయాంలో ఆ పథకాన్ని రాజకీయానికి వాడుకుందని ఆయన విమర్శించారు. ఉపాధి హామీ పథకం కింద నిధులు దుర్వినియోగం అవుతున్నాయని గతంలో తెలుగుదేశం పార్టీ కేంద్రానికి ఫిర్యాదు చేసిందని ఆయన గుర్తు చేశారు.