నెలలో మంత్రివర్గ విస్తరణ: వైయస్

హైదరాబాద్: మరో నెలలోగా మంత్రి వర్గ విస్తరణ ఉంటుందని ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. ప్రస్తుత మంత్రివర్గ పనితీరు పట్ల ఆయన సంతృప్తి వ్యక్తం చేశారు. ఆరు నెలల తర్వాత మంత్రుల పనితీరును సమీక్షించి మంత్రివర్గ విస్తరణపై నిర్ణయం తీసుకుంటామని ఆయన చెప్పారు. గత మంత్రివర్గంతో పోలిస్తే ప్రస్తుత మంత్రివర్గ పనితీరు సంతృప్తికరంగా ఉందని ఆయన అన్నారు. శాసనసభ ఆవరణలో ఆయన మంగళవారం మీడియా ప్రతినిధులతో మాట్లాడారు. వర్షాలు పడుతుండడం తనకెంతో సంతోషాన్నిస్తోందని ఆయన అన్నారు. టెక్కలి ఉప ఎన్నికలో తాను ప్రచారం చేసే విషయంపై తానింకా నిర్ణయం తీసుకోలేదని ఆయన చెప్పారు.

స్థానిక సంస్థల్లో కాంగ్రెసు పార్టీని గెలిపించాల్సిన బాధ్యత మంత్రులదేనని, స్థానిక సంస్థల ఎన్నికల ఫలితాలపై ఆధారపడి మంత్రుల పనితీరును బేరీజు వేస్తామని, స్థానిక సంస్థల ఎన్నికల్లో పార్టీ విఫలమైతే మంత్రులపై వేటు తప్పదని ఆయన అన్నారు. మంత్రులు నిర్లక్షం వహిస్తే సహించేది లేదని ఆయన అన్నారు. అక్టోబర్ తర్వాతే గ్రేటర్ హైదరాబాద్ ఎన్నికలుంటాయని, రంజాన్ పర్వదినం తర్వాత నోటిఫికేషన్ విడుదలయ్యే అవకాశం ఉందని ఆయన చెప్పారు. గ్రేటర్ హైదరాబాద్ ఎన్నికల్లో మజ్లీస్ తమతోనే ఉంటుందని ఆయన ఆశాభావం వ్యక్తం చేశారు. రైతుల రుణమాఫీ గడువును పెంచాలని కేంద్రాన్ని కోరినట్లు ఆయన తెలిపారు.