బాబు గుట్టు విప్పుతా: ప్రసన్న

హైదరాబాద్: అవసమైతే తమ పార్టీ అధ్యక్షుడు నారా చంద్రబాబు నాయుడు గుట్టు విప్పుతామని తెలుగుదేశం తిరుగుబాటు శాసనభ్యుడు నల్లపురెడ్డి ప్రసన్నకుమార్ రెడ్డి అన్నారు. మరో తిరుగుబాటు శాసనసభ్యుడు బాలనాగిరెడ్డితో కలిసి ఆయన మంగళవారం శాసనసభ ఆవరణలో మీడియా ప్రతినిధులతో మాట్లాడారు. చంద్రబాబు గుట్టంతా తమ వద్ద ఉందని, అది విప్పితే చంద్రబాబు శాశ్వతంగా రాజకీయాల నుంచి తప్పుకోవాల్సి వస్తుందని ఆయన అన్నారు.

తాము లేవనెత్తిన అంశాలకు చంద్రబాబునాయుడే స్వయంగా వివరణ ఇవ్వాలని ఆయన డిమాండ్ చేశారు. తాము లేవనెత్తిన అంశాలకు చంద్రబాబు నుంచి ఇప్పటి వరకు సమాధానం రాలేదని ఆయన అన్నారు. పార్టీని సరైన మార్గంలో పెట్టాలనే ఉద్దేశంతో తాము పార్టీలోనే ఉండి పోరాటం చేయదలుచుకున్నామని ఆయన అన్నారు. చంద్రబాబు తన తొట్టి గ్యాంగ్ తో, చెంచాలతో తమపై విమర్శలు చేయిస్తే సహించబోమని ఆయన అన్నారు. పార్టీ కార్యకర్తలకు, నాయకులకు చంద్రబాబు స్వయంగా సమాధానం ఇవ్వాల్సి ఉందని ఆయన అన్నారు.