మజ్లీస్ ఎమ్మెల్యేలపై స్పీకర్ గరం

హైదరాబాద్: మజ్లీస్ శాసనసభ్యులపై స్పీకర్ కిరణ్ కుమార్ రెడ్డి మంగళవారం శాసనసభలో తీవ్ర ఆగ్రహం వ్యక్తం చేశారు. తాము ఇచ్చిన వాయిదా తీర్మానంపై తక్షణమే చర్చ జరపాలని మజ్లీస్ సభ్యులు పట్టుబట్టారు. శంషాబాద్ విమానాశ్రయం నిర్మాణ సమయంలో కూల్చివేసిన మసీదులను తిరిగి నిర్మించాలని వారు డిమాండ్ చేశారు. వాయిదా తీర్మానాన్ని స్పీకర్ తిరస్కరించిన తర్వాత కూడా మజ్లీస్ సభ్యులు తమ పట్టు వీడలేదు. దీంతో స్పీకర్ వారిపై ఆగ్రహం వ్యక్తం చేశారు. ప్రజాసమస్యలపై దృష్టి సారించాలని ఆయన వారికి హితవు చెప్పారు. పద్ధతి మార్చుకోవాలని కూడా సూచించారు.

ప్రతిపక్షాలు ప్రతిపాదించిన వాయిదా తీర్మానాలను స్పీకర్ తిరస్కరించారు. సభ ప్రారంభం కాగానే ప్రతిపక్షాలు తాము ప్రతిపాదించిన వాయిదా తీర్మానాలపై చర్చకు పట్టుబట్టాయి. రాష్ట్రంలో ప్రబలుతున్న విష జ్వరాలు, అంటువ్యాధులు, తదితర అంశాలపై తెలుగుదేశం, తెలంగాణ రాష్ట్ర సమితి, ప్రజారాజ్యం, వామపక్షాలు వాయిదా తీర్మానాలు ప్రతిపాదించాయి. లుంబినీ పార్కు, గోకుల్ చాట్ పేలుళ్ల బాధితులకు సహాయంపై బిజెపి వాయిదా తీర్మానం ప్రతిపాదించింది.