విపక్షాల నిరసన: బిల్లు ప్రతిపాదన

హైదరాబాద్: ప్రతిపక్షాల నిరసనల మధ్యనే ప్రభుత్వం రిజిస్ట్రేషన్ సవరణ చట్టాన్ని శుక్రవారం శాసనసభలో ప్రతిపాదించారు. ఈ బిల్లు రాజ్యాంద విరుద్ధమని ప్రతిపక్షాలు విమర్శించాయి. రాజ్యాంగంలోని నిబంధనలను లోకసత్తా సభ్యుడు జయప్రకాష్ నారాయణ చదివి వినిపించారు. తెలుగుదేశం, ప్రజారాజ్యం, తెలంగాణ రాష్ట్ర సమితి, వామపక్షాలు ఈ బిల్లు ప్రతిపాదనను వ్యతిరేకించాయి. ఈ సమయంలో జయప్రకాష్ నారాయణకు మంత్రి గాదె వెంకటరెడ్డికి మధ్య వివాదం చెలరేగింది.

ఈ బిల్లు ప్రతిపాదనలో తమకు ఏ విధమైన దురుద్దేశం లేదని, ఆంధ్రా క్రికెట్ అసోయేషన్ ను దారిలో పెట్టేందుకే ఈ బిల్లును ప్రవేశపెడుతున్నామని మంత్రి వెంకటరెడ్డి చెప్పారు. రాజ్యాంగ నిబంధనలకు విరుద్ధమైతే కోర్టులున్నాయని ఆయన అన్నారు. బిల్లును ఉపసంహరించుకోవాలని ప్రతిపక్షాలు చేసిన డిమాండ్ ను మంత్రి తిరస్కరించారు. ప్రతిపక్షాల గొడవ మధ్యనే మంత్రి బిల్లు ప్రవేశపెట్టారు.