పాత్రపై నిర్ణయం అద్వానీదే: భగవత్

హరిద్వార్: బిజెపిలో ఏ పాత్ర నిర్వహించాలనేది అద్వానీ, రాజ్ నాథ్ లే నిర్ణయించుకోవాలని రాష్ట్రీయ స్వయం సేవక్ సంఘ్ (ఆర్ ఎస్ ఎస్) చీఫ్ మోహన్ భగవత్ సోమవారం అన్నారు. అద్వానీ, రాజ్ నాథ్ లు తమ పార్టీ పదవుల నుంచి తప్పుకుంటారనే వార్తలు వెలువడుతున్న నేపథ్యంలో ఆయన ఆ విధంగా అన్నారు. రాజ్ నాథ్, అద్వానీ, ఇతర నాయకులు తాము పార్టీలో నిర్వర్తించాల్సిన పాత్ర గురించి వారే నిర్ణయించుకుంటారని, భవిష్యత్తులో బిజెపి బాగు పడుతుందని ఆయన అన్నారు.

అద్వానీ లాంటి నాయకులు సమస్యలను వారే పరిష్కరించుకుంటారని, ఈ విషయంలో తాము చేసేది ఏమీ ఉండదని, తాము చెప్పాల్సింది చెప్పామని ఆయన అన్నారు. పార్టీ అధ్యక్షుడిగా రాజ్ నాథ్ కు పొడిగింపు ఉండకపోవచ్చునని పార్టీ వర్గాలు చెప్పాయి. అద్వానీ ప్రతిపక్ష నేత పదవి నుంచి తప్పుకోవచ్చునని అంటున్నారు. భగవత్ ఆదివారంనాడు అద్వానీతో చర్చలు జరిపారు. ఇతర బిజెపి నాయకులతోనూ ఆయన మాట్లాడారు.