కాంగ్రెస్ గూటికి రోజా

హైదరాబాద్: తెలుగు మహిళ అధ్యక్షురాలు రోజా కాంగ్రెసు గూటికి చేరుతున్నారు. ఎన్నికల తర్వాత ఆమె తెలుగుదేశం కార్యక్రమాలకు దూరంగా ఉంటున్నారు. రోజా కూడా తమ పార్టీలో చేరడానికి సిద్ధంగా ఉన్నారని ఆ మధ్య ముఖ్యమంత్రి డాక్టర్ వైయస్ రాజశేఖర రెడ్డి చెప్పినప్పుడు కొంత గందరగోళం ఏర్పడింది. అయితే ఆ వార్తలను రోజా ఖండించారు. కానీ కాంగ్రెసుతో ఆమె సంప్రదింపులు సాగుతూనే ఉన్నాయి. రోజా ఆదివారంనాడు భూమన్ కరుణాకర్ రెడ్డి, తన సోదరుడు రాంప్రసాద్ రెడ్డితో కలిసి ముఖ్యమంత్రిని కలిశారు. ఆ సమయంలో ముఖ్యమంత్రి సన్నిహిత మిత్రుడు కెవిపి రామచందర్ రావు కూడా ఉన్నారు. దాదాపు 20 నిమిషాల పాటు రోజా ముఖ్యమంత్రితో సమావేశమయ్యారు.

కాగా, తాను ముఖ్యమంత్రిని అభినందించడానికి మాత్రమే వచ్చానని రోజా అన్నారు. కానీ రోజా త్వరలోనే కాంగ్రెసు పార్టీలో చేరుతారని కాంగ్రెసు వర్గాలు అంటున్నాయి. ముఖ్యమంత్రితో సమావేశం సందర్భంగా రోజా రాజకీయ భవిష్యత్తు గురించి, ఇతర అంశాల గురించి చర్చ జరిగినట్లు చెబుతున్నారు. తాను తెలుగుదేశం పార్టీలో ఇబ్బందికర పరిస్థితిని ఎదుర్కుంటున్నానని, అందుకే పార్టీ కార్యక్రమాలకు దూరంగా ఉంటున్నానని రోజా చెప్పారు.

రోజాను కాంగ్రెసులో చేర్చుకోవడానికి మంత్రి గల్లా అరుణకుమారి తీవ్రంగా వ్యతిరేకించారు. అయితే ముఖ్యమంత్రి అరుణకుమారికి నచ్చజెప్పినట్లు సమాచారం. చంద్రగిరి నియోజకవర్గంలో అరుణ కుమారిపై రోజా పోటీ చేసి ఓడిపోయారు. ఆ సమయంలో అరుణకుమారిపై రోజా పదునైన వ్యాఖ్యలు కూడా చేశారు.