'రోజా కుటుంబాన్ని భయపెట్టారు'

హైదరాబాద్: తమ పార్టీ నాయకురాలు రోజా కుటుంబ సభ్యులను ముఖ్యమంత్రి డాక్టర్ వైయస్ రాజశేఖర రెడ్డి భయపెట్టారని తెలుగుదేశం పార్టీ నాయకుడు ఎర్రబెల్లి దయాకర రావు విమర్శించారు. భయపెట్టడం వల్లనే రోజా కాంగ్రెసు పార్టీలోకి వెళ్తున్నారని ఆయన సోమవారం ఉదయం మీడియా ప్రతినిధులతో అన్నారు. రోజాకు తమ పార్టీ అన్ని విధాలా గుర్తింపునిచ్చిందని, పార్టీ వీడిపోతానని ఆమె అనడం అర్థరహితమని ఆయన అన్నారు.

రోజా తన నిర్ణయాలు తాను తీసుకుంటే తాము చేసేది ఏమీ లేదని మరో తెలుగుదేశం నాయకుడు గాలి ముద్దుకృష్ణమ నాయుడు అన్నారు. ఆమె తెలుగుదేశం పార్టీ నాయకులపై చేసిన విమర్శలను మీడియా ప్రతినిధుల ప్రస్తావించగా వెళ్లిపోయేటప్పుడు ఎవరైనా మాట్లాడే మాటలేనని ఆయన కొట్టిపారేశారు. ఐదేళ్ల పాటు పార్టీలో ఎదిగి ఇప్పుడు వెళ్లిపోతానంటే దాన్ని రోజా విజ్ఝతకే వదిలేస్తామని ఆయన అన్నారు. ఒక్కరిద్దరు పార్టీని వీడిపోవడం వల్ల పార్టీకి జరిగే నష్టం ఏమీ లేదని ఆయన అన్నారు.