వందకు చేరిన స్వైన్ ఫ్లూ మృతులు

న్యూఢిల్లీ: దేశవ్యాప్తంగా సోమవారం మరో ఏడు స్వైన్ ఫ్లూ మరణాలు సంభవించాయి. ఇందులో నలుగురు మహారాష్ట్రలో మరణించారు. దీంతో దేశవ్యాప్తంగా స్వైన్ ఫ్లూ వల్ల మరణించినవారి సంఖ్య వందకు చేరిందని న్యూఢిల్లీలోని ఆరోగ్య శాఖాధికారులు చెప్పారు. మహారాష్ట్రలోని ఇప్పటి వరకు 55 మంది మరణించారు. సోమవారం కర్నాటకలో మరో ఇద్దరు బలయ్యారు.

తాజాగా మరో 106 మందికి స్వైన్ ఫ్లూ సోకినట్లు నిర్ధారణ అయింది. దీంతో స్వైన్ ఫ్లూ వ్యాధి సోకినవారి సంఖ్య దేశంలో 3,987కు చేరుకుంది. మహారాష్ట్ర ఇంకా స్వైన్ ఫ్లూ వ్యాధితో విలవిలలాడుతూనే ఉంది. మరణాల విషయంలోనే కాకుండా కేసుల నమోదులో కూడా మహారాష్ట్ర మొదటి స్థానంలో ఉంది.