జగన్ ను సిఎంగా చేయండి: క్యాబినెట్

హైదరాబాద్: హెలికాప్టర్ ప్రమాదంలో మరణించిన ముఖ్యమంత్రి డాక్టర్ వైయస్ రాజశేఖర రెడ్డి కుమారుడు వైయస్ జగన్మోహన్ రెడ్డికి ముఖ్యమంత్రి పదవి అప్పగించాలని కాంగ్రెసు పార్టీ అధిష్ఠాన వర్గాన్ని కోరుతూ రాష్ట్ర మంత్రి వర్గ సమావేశం గురువారం తీర్మానం చేసింది. ఆపద్ధర్మ ముఖ్యమంత్రి కె.రోశయ్య అధ్యక్షతను మంత్రివర్గం గురువారం సాయంత్రం సచివాలయంలో సమావేశమైంది. కడపను వైయస్ఆర్ జిల్లాగా ప్రకటించాలని కూడా మంత్రి వర్గం తీర్మానం చేసింది. వైయస్ రాజశేఖర రెడ్డి మృతికి సంతాపం ప్రకటిస్తూ మంత్రివర్గం తీర్మానం చేసింది.

జగన్ ను వైయస్ రాజశేఖరరెడ్డి వారసుడిగా ప్రకటించాలని చాలా మంది మంత్రులు ఇప్పటికే విజ్ఝప్తి చేశారు. కొత్త ముఖ్యమంత్రిగా ఎవరిని చేయాలనేది అధిష్ఠాన వర్గం నిర్ణయంపై ఆధారపడి ఉంటుందని, ఇది ఎవరో ఒకరు నిర్ణయించేది కాదని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ అన్నారు. జగన్ ను ముఖ్యమంత్రిని చేయడానికి మద్దతు ఇవ్వాలని కాంగ్రెసు శాసనసభ్యులు కొంత మంది ప్రజారాజ్యం పార్టీ అధినేత చిరంజీవిని కోరారు. వారు చిరంజీవిని కలిసి ఈ మేరకు విజ్ఝప్తి చేశారు.