ఇంకా దొరకని వైయస్ ఆచూకీ

హైదరాబాద్: ముఖ్యమంత్రి డాక్టర్ వైయస్ ఆచూకీ గురువారం ఉదయానికి కూడా తెలియలేదు. ముఖ్యమంత్రి హెలికాప్టర్ బుధవారం ఉదయం 9 గంటల 02 నిమిషాలకు అదృశ్యమైంది. అప్పటి నుంచి గాలింపు చర్యలు చేపడుతూనే ఉన్నారు. ఇంకా ముఖ్యమంత్రి క్షేమంగానే ఉండి ఉంటారనే వార్తలు వస్తున్నాయి. సుఖోయ్ యుద్ద విమానం కూడా బుధవారం గాలింపు చర్యలు చేపట్టింది. ఇస్రో రిమోట్ సెన్నింగ్ చిత్రాలు కూడా వచ్చాయి. అయితే వాటిలో విలువైన సమాచారం లేదని ఆర్థిక మంత్రి చెప్పారు. పది వేలమంది సిఆర్పీఎఫ్ బలగాలు రంగంలోకి దిగాయి. సుఖోయ్, ఇస్రో విమానాలు గాలింపు చర్యలకు దిగాయి. బుధవారం రాత్రి గాలింపు చర్యలు ఆగిపోయాయి.

రా బలగాలు కూడా రంగంలోకి దిగాయి. కేంద్ర, రాష్ట్ర బలగాలు గాలింపు చర్యలు చేపట్టాయి. వైమానిక దళాలకు చెందిన హెలికాప్టర్లు కూడా గాలింపు చర్యలకు దిగాయి. భారత ప్రభుత్వం అమెరికా సహాయాన్ని కూడా కోరినట్లు తెలుస్తోంది. బుధవారం రాత్రి కేంద్ర మంత్రులు ఎస్ జైపాల్ రెడ్డి, వీరప్ప మొయిలీ, పృథ్వీరాజ్ చవాన్ హైదరాబాద్ చేరుకున్నారు. రాష్ట్ర మంత్రులు కర్నూలు జిల్లా అత్మకూరును కేంద్రంగా చేసుకుని గాలింపు చర్యలను పర్యవేక్షిస్తున్నారు. ప్రకాశం, నెల్లూరు, చిత్తూరు, కర్నూలు, మహబూబ్ నగర్ జిల్లాల్లో గాలింపు కొనసాగుతోంది. నల్లమల అడవిని జల్లెడ పడుతున్నారు. చెంచులు కూడా రంగంలోకి దిగారు.

మాస్కోలో ఉన్న రాష్ట్రపతి ప్రతిభా పాటిల్ బుధవారం ముఖ్యమంత్రి పరిస్థితిపై అడిగి తెలుసుకున్నారు. ప్రధాని మన్మోహన్ సింగ్, కాంగ్రెసు అధ్యక్షురాలు సోనియా గాంధీ ఢిల్లీలో ఎప్పటికప్పుడు పరిస్థితిని సమీక్షిస్తున్నారు. కేంద్ర మంత్రులు ప్రణబ్ ముఖర్జీ, తదితరులు ప్రధానితో సమావేశమై పరిస్థితిని సమీక్షించారు.