వైయస్ ఆచూకీపై కోర్ కమిటీ మీట్

న్యూఢిల్లీ: ముఖ్యమంత్రి డాక్టర్ వైయస్ రాజశేఖర రెడ్డి ప్రయాణించిన హెలికాప్టర్ ఆచూకీ లభ్యం కావడంతో కాంగ్రెసు కోర్ కమిటీ గురువారం ఉదయం సమావేశమైంది. గురువారం ఉదయం ప్రధాని డాక్టర్ మన్మోహన్ సింగ్ నివాసంలో కోర్ కమిటీ కొద్ది సేపటి క్రితం సమావేశమైంది. ఈ సమావేశానికి కాంగ్రెసు అధ్యక్షురాలు సోనియా గాంధీతో పాటు కేంద్ర మంత్రులు పి చిదంబరం, ఎకె ఆంటోనీ, సోనియా రాజకీయ సలహాదారు అహ్మద్ పటేల్ హాజరయ్యారు.

ముఖ్యమంత్రి హెలికాప్టర్ అదృశ్యం కావడంతో, దాని ఆచూకీ తెలియకపోవడంతో గందరగోళ పరిస్థితి నెలకొన్న నేపథ్యంలో సోనియా గాంధీ గురువారం హైదరాబాదు వెళ్తారని వార్తలు వచ్చాయి. అయితే అమె ఇప్పుడు హైదరాబాదు వెళ్తారా, లేదా అనేది తెలియడం లేదు. ముఖ్యమంత్రి క్షేమసమాచారాలపై వివరాలు తెలియడానికి సమయం పట్టే అవకాశం ఉంది.