సిఎం రేసులో లేను: రోశయ్య

హైదరాబాద్: తాను ముఖ్యమంత్రి పదవికి రేసులో లేనని రాష్ట్ర ఆర్థిక మంత్రి కె. రోశయ్య అన్నారు. రాష్ట్ర ఆపద్ధర్మ ముఖ్యమంత్రిగా ప్రమాణ స్వీకారం చేసే ముందు ఆయన గురువారం మీడియా ప్రతినిధులతో అన్నారు. ఆపద్ధర్మ ముఖ్యమంత్రిగా ఉండాలని గవర్నర్ ను ఎవరినైనా ఆహ్వానించవచ్చునని, గవర్నర్ తనను ఆహ్వానించారని ఆయన అన్నారు. రాజభవన్ లో ఆయన ఆపద్ధర్మ ముఖ్యమంత్రిగా ప్రమాణ స్వీకారం చేశారు. అనంతరం మంత్రి వర్గ సమావేశం ఏర్పాటైంది. ముఖ్యమంత్రి రాజశేఖర రెడ్డి మృతికి సంతాపం ప్రకటిస్తూ మంత్రివర్గం తీర్మానం చేసింది.

కాంగ్రెసు పార్టీ అధిష్టానవర్గం ఆదేశాల మేరకే తాను ఆపద్ధర్మ ముఖ్యమంత్రిగా ప్రమాణం చేశానని,ఇది తన శక్తికి మించిన పని అని ఆయన అన్నారు.కొత్త నాయకుడిని ఎన్నుకునే వరకు తాను ఆపద్ధర్మ ముఖ్యమంత్రిగా కొనసాగుతానని ఆయన చెప్పారు. బరువైన గుండెతో తాను ప్రమాణం స్వీకారం చేశానని ఆయన చెప్పారు. ఇదిలా ఉంటే, సంతాపదినాలు ముగిసిన తర్వాతనే కొత్త ముఖ్యమంత్రి ఎంపిక జరుగుతుందని కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ న్యూఢిల్లీలో చెప్పారు.