సమాచారం కొద్దిగా తెలిసింది: త్రివేది

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి ప్రయాణించిన హెలికాప్టర్ కు సంబంధించిన సమచారం కొద్దిగా తెలిసిందని ఆపరేషన్ చేపట్టిన అధికారి రాజీవ్ త్రివేది చెప్పారు. దేవుని దయ వల్ల అంతా సవ్యంగా ఉంటుందని ఆశిస్తున్నామని ఆయన అన్నారు. తాము అక్కడికి బయలుదేరుతున్నామని ఆయన చెప్పారు. హెలికాప్టర్ ఆచూకీ లభ్యమైందని కచ్చితంగా అధికారులు చెబుతున్నారు.

రఘువీరా రెడ్డి తదితర మంత్రులతో కూడిన బృందం సంఘటనా స్థలానికి కొద్ది దూరంలోనే ఉంది. అయితే వారు అక్కడికి చేరుకోలేకపోతున్నారు. వాగు పొంగి పొర్లుతుండడంతో దాన్ని దాటడం వీలు కావడం లేదు. ముఖ్యమంత్రి ఏ స్థితిలో ఉన్నారనేది చెప్పలేమని వైమానిక దళం కమాండర్ భారతి అంటున్నారు. వెలిగొండకు సమీపంలోని కొండపై హెలికాప్టర్ చిక్కుకుని ఉంది. ఆత్మకూరుకు సమీపంలో ఆ స్థలం ఉంది. కర్నూలు, ప్రకాశం సరిహద్దుల్లో ఒక దేవాలం ఉంటుంది. ఆ దేవాలయానికి సమీపంలోనే హెలికాప్టర్ చిక్కుకున్న కొండ ఉంది.అది దట్టమైన అటవీ ప్రాంతమని కూడా చెబుతున్నారు.