వైయస్ రోల్ మోడల్: ప్రధాని

న్యూఢిల్లీ: హెలికాప్టర్ ప్రమాదంలో మరణించిన ముఖ్యమంత్రి డాక్టర్ వైయస్ రాజశేఖర రెడ్డిని ప్రధాని డాక్టర్ మన్మోహన్ సింగ్ రోల్ మోడల్ గా అభివర్ణించారు. ప్రజాసేవ పట్ల మొక్కవోని నిబద్ధత గల అద్భుతమైన నాయకుడు రాజశేఖర రెడ్డి అని ఆయన గురువారం అన్నారు. రాజశేఖర రెడ్డి సతీమణి విజయలక్ష్మికి ఆయన సంతాప సందేశాన్ని పంపారు. రాజశేఖర రెడ్డి పేద ప్రజల బాంధవుడని ఆయన అన్నారు. మద్దతు, ఆలోచన కోసం రాజశేఖర రెడ్డి మీద ఆధారపడడానికి వీలు గల ఉత్తమ సహచరుడని ఆయన అన్నారు.

రాజశేఖర రెడ్డి లేని లోటు పూడేది కాదని ఆయన అన్నారు. దేశం ఆదర్శవంతమైన ముఖ్యమంత్రిని కోల్పోయిందని, ఇతర రాష్ట్రాలకు ఆయన ఆదర్శంగా నిలిచారని ప్రధాని అన్నారు. రాజశేఖర రెడ్డిని ఆయన సహజ నాయకుడిగా అభివర్ణించారు. ఆంధ్రప్రదేశ్ అభివృద్ధి పట్ల మొక్కవోని నిబద్ధతను వైయస్ ప్రదర్శించారని ఆయన అన్నారు.కాంగ్రెసు పార్టీకి వైయస్ అందించిన సేవలను మరువలేనివని ఆయన అన్నారు.