శోక సముద్రంలో వెస్లీ కుటుంబం

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డితో పాటు హెలికాప్టర్ ప్రమాదంలో మరణించిన ఆయన చీప్ సెక్యూరిటీ అధికారి జాన్ వెస్లీ కుటుంబ శోక సముద్రంలో మునిగింది. హైదరాబాదులోని మెహిదీపట్నంలో గల ఆయన ఇంటికి బంధువులు, సన్నిహితులు వచ్చి కుటుంబ సభ్యులను ఓదారుస్తున్నారు. ముఖ్యమంత్రి ప్రధాన భద్రతాధికారి జాన్ వెస్లీ మృతి పోలీసు శాఖకు తీరని లోటని ఇంటలిజెన్స్ చీఫ్ అరవిందరావు అన్నారు. ప్రమాద కారణాలపై పౌర విమాన యాన శాఖ దర్యాప్తు చేస్తోందని ఆయన చెప్పారు. వెస్లీ కుటుంబ సభ్యులను అరవిందరావుతో పాటు శాంతి భద్రతల అదనపు డిజి ఎకె ఖాన్ పరామర్శించారు.

ప్రకాశం జిల్లాకు చెందిన వెస్లీ తన పాఠశాల విద్యను ఒంగోలులో పూర్తి చేశారు. హైదరాబాదులోని ఉస్మానియా విశ్వవిద్యాలయంలో ఆయన చదువుకున్నారు. 1988లో గ్రూప్ వన్ ద్వారా డిఎస్పీగా ఉద్యోగంలో చేరారు. వరంగల్ జిల్లా నర్సంపేట డీఎస్పీగా, హైదరాబాదు టాస్క్ ఫోర్సు డిసిపిగా పనిచేశారు. వెస్లీకి భార్య, ఇద్దరు పిల్లలున్నారు.