'క్రాష్ అయిందా, లేదా చెప్పలేం'

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి హెలికాప్టర్ కూలిపోయిందా, సురక్షితంగా దిగిందా అనేది ఇప్పుడే చెప్పలేమని సంబంధిత వర్గాలంటున్నాయి. కర్నూలుకు తూర్పు దిశగా 70 కిలోమీటర్ల దూరంలో హెలికాప్టర్ ఆచూకీ కనిపించింది. దీంతో 23 గంటల అన్వేషణకు తెర పడింది. తాము కొద్ది సమయంలోనే సంఘటనా స్థలానికి చేరుకోగలుగుతామని, అర గంటలో ముఖ్యమంత్రి పరిస్థితిపై సమాచారం లభిస్తుందని మంత్రి రఘువీరా రెడ్డి అంటున్నారు. కర్నూలు బేస్ క్యాంపు నుంచి వైమానిక దళాల విమానం బయలుదేరింది.

మరో మూడు హెలికాప్టర్ కూడా కర్నూలు బెస్ క్యాంపు నుంచి బయలుదేరాయి. బుధవారం సాయంత్రం ఆ చోటుకి దగ్గరగా చేరుకున్నట్లు, అయితే అక్కడ వాగు పొంగి పొర్లుతుండడంతో అక్కడికి చేరుకోలేకపోయామని రఘువీరా రెడ్డి చెప్పారు. మంత్రులు రఘువీరా రెడ్డితో పాటు జూపల్లి కృష్ణారావు తదితరులు గాలింపును పర్యవేక్షిస్తున్నారు. ఆత్మకూరుకు దాదాపు 20 కిలోమీటర్ల దూరంలో ఉంటుందని చెబుతున్నారు. రుద్రపోరు గుట్టలపై హెలికాప్టర్ చిక్కుకుందని చెబుతున్నారు.