70 రోజులకు జాక్సన్ అంత్యక్రియలు

కాలిఫోర్నియా: ఎట్టకేలకు పాప్ రారాజు మైఖెల్ జాక్సన్ అంత్యక్రియలు జరిగాయి. మరణించిన 70 రోజుల తర్వాత 200 మంది బంధువులు, సన్నిహిత మిత్రుల మధ్య గురువారంనాడు నిర్ణీత సమయం కన్నా గంటన్నర ఆలస్యంగా ఆయన భౌతిక కాయాన్ని సమాధి చేశారు. ఫారెస్టు లాన్ గ్లెండేల్ కు ఆయన తల్లిదండ్రులు కాథరిన్, జో, కుటుంబ సభ్యులు చేరుకోవడంలో జాప్యం కావడంతో అంత్యక్రియల్లో కూడా జాప్యం జరిగింది.

అంత్యక్రియల్లో జాక్సన్ ముగ్గురు పిల్లలు ప్రిన్స్ మైఖెల్, పారిస్ మైఖెల్, బ్లాంకెట్ గా పిలిచే ప్రిన్స్ మైఖెల్ -2 పాల్గొన్నారు. పలువురు పాప్ గాయకులు ఈ కార్యక్రమంలో పాల్గొన్నారు. పౌరహక్కుల కార్యకర్త రెవరెండ్ ఆల్ షార్ప్ టన్ కార్యక్రమంలో మాట్లాడారు. సూర్యాస్తమయానికి కొద్ది ముందుగా జాక్సన్ భౌతిక కాయాన్ని సమాధి చేశారు.