తప్పించుకున్న మంత్రులు

ముఖ్యమంత్రి వైఎస్ రాజశేఖరరెడ్డి పాటు హెలీకాప్టర్ లో వెళ్దాం అనుకున్న ఇద్దరు మంత్రులు, ఆయన సన్నిహితుడు అదృష్టావశాత్తు చివరి నిమిషంలో ప్రాణాలతో బయటపడ్డారు. చిత్తూరు జిల్లాలో సీఎం నిర్వహించబోయే రచ్చబండ కార్యక్రమానికి ఆయనతో పాటు హెలీకాప్టర్ లో వెళ్తానని చిత్తూరు జిల్లాకు చెందిన రోడ్లు, భవనాల శాఖా మంత్రి గల్లా అరుణకుమారి ముఖ్యమంత్రి కార్యాలానికి తెలియజేసారు. మొదట్లో చూద్దాంలే అనుకున్న అధికారులు ప్రయాణానికి ముందు రోజు మధ్యాహ్నం కాస్తా ఆమె చిత్తూరు వెళ్లి సీఎం కు స్వాగతం పలికితే బాగుంటుందని అధికారులు భావించారు. దీంతో ఆమె అయిష్టంగానే అందుకు అంగీకరించారు. అటవీ శాఖా మంత్రి రామచంద్రారెడ్డి కూడా అధికారుల సూచనమేరకు మంగళవారమే చిత్తూరు చేరుకున్నారు.

అలాగే వైఎస్ సన్నిహితుడు రవిచంద్ కూడా వైఎస్ తో వెళ్లాలనుకున్నప్పటికీ, హెలీకాప్టర్ లో మూడు గంటలు ప్రయాణించడానికి మాత్రమే ఇంధనం వున్నందున, పైలట్ భాటియా ముగ్గురు ప్రయాణికులను మాత్రమే తీసుకెళ్తానని చెప్పడంతో ఆయన ఆగిపోయారు. అలాగే ఎప్పుడూ వైఎస్ వెన్నంటి వుండే సూరీడుకు ముందుగా వెళ్లాల్సిన అవసరం లేదని చెప్పడంతో ఆయనా ఆగిపోయారు. వాస్తవానికి 8 మంది ప్రయాణించడానికి ఈ హెలీకాప్టర్ లో వీలున్నప్పటికీ, వివిధ కారణాల వల్ల చివరకు పైలట్లతో సహా ఐదు మందే ప్రయాణించి దురదృష్టావశాత్తు కొండను ఢీకొని దుర్మరణం చెందారు.