జాడ తెలిపిన వెస్లీ ఎస్ఎంఎస్

హైదరాబాద్: కర్నూలు జిల్లాలో కూలిన ముఖ్యమంత్రి డాక్టర్ వైయస్ రాజశేఖర రెడ్డి హెలికాప్టర్ సమాచారాన్ని ఒక్క ఎస్ఎంఎస్ పట్టించింది. విమానం కూలిపోయిన వెంటనే ముఖ్యమంత్రి ప్రధాన భద్రతాధికారి జాన్ వెస్లీ ఆ ఎస్ఎంఎస్ ఇచ్చారు. హెలికాప్టర్ లో ఉన్న వారికి చెందిన ఒకరి సెల్ ఫోన్ నుంచి మెసేజ్ వచ్చినట్లు రాష్ట్ర అధికారులు చెబుతూనే ఉన్నారు. అత్యాధునిక పరిజ్ఞానాన్ని వాడి హెలికాప్టర్ శకలాల జాడను కనిపెట్టారు.

బుధవారం మధ్యాహ్నం 12 గంటల 6 నిమిషాలకు జాన్ వెస్లీ సెల్ నుంచి ఎస్ఎంఎస్ వచ్చినట్లు తెలుస్తోంది. అప్పటికి హెలికాప్టర్ అదృశ్యమై రెండున్నర గంటలవుతోంది. ఎస్ఎంఎస్ సర్వీస్ ప్రొవైడర్ కంటెంట్ ను అధికారులు వెల్లడించడానికి నిరాకరిస్తున్నారు. అయితే చివరి సిగ్నల్ మాత్రం ఆ సెల్ నుంచి వచ్చినట్లు చెప్పారు. ఆ ఎస్ఎంఎస్ ఆధారంగా ఆధునిక సాంకేతిక పరిజ్ఞానంతో విశ్లేషించి నాలుగు కిలోమీటర్ల పరిధిలో గాలింపు జరిపారు. దాంతో హెలికాప్టర్ కూలిన ప్రదేశం దొరికింది. దాని ఆధారంగ హకీంపేట హెలికాప్టర్ శిక్షణా పాఠశాలకు చెందిన రెండు హెలికాప్టర్లలో ఒకటి ఆరున్నరకే ఆ ప్రదేశంలో దిగింది. రెండు గంటల గాలింపు తర్వాత ఉదయం ఎనిమిదిన్నరకు కూలిన హెలికాప్టర్ శకలాలు కనిపించాయి.