మరోసారి మంత్రుల ప్రమాణం

హైదరాబాద్: రాష్ట్ర మంత్రివర్గ సభ్యులు మరోసారి ప్రమాణ స్వీకారం చేయనున్నారు. రాజ్యాంగ నిపుణులను సంప్రదించిన తర్వాత మంత్రుల చేత మరోసారి ప్రమాణం చేయించాలని రాష్ట్ర గవర్నర్ ఎన్డీ తివారి నిర్ణయించారు. వారు ఆదివారం సాయంత్రం నాలుగు గంటలకు రాజభవన్ లో ప్రమాణ స్వీకారం చేస్తారు. ఈ కార్యక్రమాన్ని నిరాడంబరంగా నిర్వహించాలని ముఖ్యమంత్రి కె. రోశయ్య నిర్ణయించుకున్నారు. మొత్తం 34 మంది మంత్రుల చేత ఒకేసారి ప్రమాణం చేయించాలనే ఆలోచన కూడా ఉంది.

ముఖ్యమంత్రిగా రోశయ్య ఇంతకు ముందే ప్రమాణ స్వీకారం చేశారు. మంత్రుల చేత తిరిగి ప్రమాణం చేయించాలా వద్దా అని ముఖ్యమంత్రి రోశయ్య శనివారం తర్జనభర్జనలు జరిపారు. రాజ్యాంగ నిపుణులను సంప్రదించారు. మరోసారి వారి చేత ప్రమాణం చేయించాల్సిన అవసరం లేదని కూడా ఒక అభిప్రాయం వ్యక్తమైంది.