సిఎం రేసులో పురంధేశ్వరి

న్యూఢిల్లీ: రాష్ట్ర ముఖ్యమంత్రి పదవికి కేంద్ర మంత్రి, స్వర్గీయ ఎన్టీ రామారావు కూతురు దగ్గుబాటి పురంధేశ్వరి కూడా రేసులో ఉన్నారు. ఈ విషయాన్ని ఆమె శనివారం సాయంత్రం మీడియా ప్రతినిధుల వద్ద తోసిపుచ్చలేదు. మీరు ముఖ్యమంత్రి పదవికి రేసులో ఉన్నారా అని అడిగితే పార్టీ అధిష్టానవర్గం ఈ విషయాన్ని పరిశీలిస్తుందని ఆమె చెప్పారు. అధిష్ఠానవర్గానికి ముఖ్యమంత్రి పదవికి అభ్యర్థిని ఎంపిక చేసే సత్తా ఉందని ఆమె వ్యాఖ్యానించారు.

మీరు ముఖ్యమంత్రి పదవికి రేసులో ఉన్నారా అని అడిగితే తొలుత వ్యాఖ్యానించడానికి నిరాకరించారు. ముఖ్యమంత్రి పదవికి వైయస్ జగన్మోహన్ రెడ్డి పేరుతో పాటు పురంధేశ్వరి, కేంద్ర మంత్రులు ఎస్ జైపాల్ రెడ్డి, పల్లంరాజు పేర్లు కూడా వినిపిస్తున్నాయి. అయితే, జగన్ ను ముఖ్యమంత్రిని చేయాలని రాష్ట్ర మంత్రులు, శాసనసభ్యులు, రాష్ట్ర కాంగ్రెసు పార్లమెంటు సభ్యులు పార్టీ అధిష్ఠానవర్గంపై ఒత్తిడి పెరుగుతోంది.