భర్తను చంపిన ఇద్దరు భార్యలు

కరీంనగర్: భర్తను చంపిన భార్యల ఉదంతం కరీంనగర్ జిల్లాలో చోటు చేసుకుంది. ఇద్దరు భార్యలు కలిసి తమ భర్త శంకరయ్యను హతమార్చారు. ఈ సంఘటన కరీంనగర్ జిల్లా కమాన్ పూర్ మండలం పెద్దంపేట గ్రామంలో జరిగింది. శంకరయ్య అనే వ్యక్తిని భార్యలు, పిల్లలు కలిసి హత్య చేశారు. వారికి మరో నలుగురు సహకరించారు. తమను వేధిస్తుండడం వల్లనే చంపేశామని భార్యలు చెబుతుండగా డబ్బుల కోసం హత్య చేశారని పోలీసులు అంటున్నారు. తమ తండ్రిని ఆటోలో వచ్చిన నలుగురు హత్య చేయడం తాము చూశామని శంకరయ్య కుమారులు హరికృష్ణ, గోపీకృష్ణ, కూతురు శ్రీవాణి చెబుతున్నారు.

శంకరయ్య అనే వ్యక్తి వరంగల్ జిల్లా దుగ్యాల గ్రామానికి చెందిన పుష్పను పెళ్లి చేసుకున్నాడు. ఆమెకు పిల్లలు కలగడం లేదని ఆ తర్వాత ఆమె సోదరి సుజాతను వివాహం చేసుకున్నాడు. తొలి భార్యకు ఒక కొడుకు పుట్టాడు. రెండో భార్యకు ముగ్గురు కూతుళ్లు, ఒక కొడుకు పుట్టారు. కొంత కాలం క్రితం గొడవలతో భార్యలను వారి పుట్టింటికి పంపించాడు. ఐదు రోజులుగా తిరిగి రావాలని శంకరయ్య వారికి ఫోన్ లు చేశాడు. దీంతో ఒక పథకం వేసుకుని వారు పెద్దంపేటకు వచ్చారు. శంకరయ్య భోజనం చేసి చేతులు కడుక్కోవడానికి బయటకు రాగానే నలుగురు వ్యక్తులు దాడి చేసి హత్య చేశారు. సింగరేణిలో పనిచేస్తున్న శంకరయ్యకు 40 లక్షల రూపాయలు వస్తున్నాయని, వాటి కోసమే భార్యలు హత్య చేయించారని అనుమానాలు వ్యక్తమవుతున్నాయి.