సిఎం పదవిపై జైపాల్ నో కామెంట్

హైదరాబాద్: రాష్ట్ర ముఖ్యమంత్రి ఎవరవుతారనేది దానిపై తాను ఏమీ మాట్లాడబోనని కేంద్ర మంత్రి, సీనియర్ కాంగ్రెసు నేత ఎస్. జైపాల్ రెడ్డి అన్నారు. ఆ విషయంపై తాను ఇప్పుడే ఏమీ వ్యాఖ్యానించదలుచుకోలేదని ఆయన ఆదివారం సాయంత్రం మీడియా ప్రతినిధులతో అన్నారు. ముఖ్యమంత్రి పదవికి జైపాల్ రెడ్డి పేరు కూడా పరిశీలనలో ఉందని వార్తలు వస్తున్న నేపథ్యంలో ఆయన ఈ విధంగా అన్నారు. వాటిని అర్థంలేని వార్తలుగా ఆయన కొట్టి పారేశారు.

వైయస్ జగన్మోహన్ రెడ్డి ముఖ్యమంత్రి కావాలంటూ వస్తున్న వార్తలపై కూడా ఆయన మాట్లాడలేదు. ఈ విషయంపై పార్టీ అధిష్ఠాన వర్గంతో మాట్లాడిన తర్వాతనే మాట్లాడుతానని ఆయన చెప్పారు. మీరు సిఎం రేసులో లేరా అని వేసిన ప్రశ్నకు ఆయన సమాధానం ఇవ్వడానికి నిరాకరించారు. జైపాల్ రెడ్డిని ఆదివారం సాయంత్రం సీనియర్ కాంగ్రెసు శాసనసభ్యుడు కె. జానారెడ్డి కలిశారు.