టిడిపికి రోజా రాజీనామా

హైదరాబాద్:తెలుగు మహిళ రాష్ట్ర అధ్యక్షురాలు రోజా తెలుగుదేశం పార్టీకి సోమవారం సాయంత్రం రాజీనామా చేశారు. తన రాజీనామా లేఖను ఆమె పార్టీ కార్యాలయం ఎన్టీఆర్ ట్రస్టు భవన్ కు పంపింది. తెలుగుదేశం పార్టీలో తనకు ఆదరణ లభిస్తుందనే నమ్మకం పోయిందని రోజా చెప్పారు.ఆమె అంతకు ముందు దివంగత నేత వైయస్ రాజశేఖర రెడ్డిని కలిసి కాంగ్రెసులో చేరడానికి సిద్ధపడ్డారు. అయితే అకస్మాత్తుగా వైయస్ రాజశేఖర రెడ్డి మరణించడం ఆమె రాజకీయ జీవితంపై దెబ్బ వేసింది. ఫాక్స్ ద్వారా ఆమె తన రాజీనామా లేఖను పార్టీ అధ్యక్షుడు నారా చంద్రబాబు నాయుడుకు పంపించారు. పార్టీ ప్రాథమిక సభ్యత్వానికి, తెలుగు మహిళ అధ్యక్ష పదవికి ఆమె రాజీనామా చేశారు. పదేళ్ల పాటు పని చేసేందుకు అవకాశం ఇచ్చినందుకు ఆమె కృతజ్ఞతలు తెలిపారు. తాను పార్టీ ఆదేశాలను పాటించానని, పార్టీకి వ్యతిరేకంగా ఎప్పుడూ వ్యవహరించలేదని ఆమె చెప్పారు.

రోజా ఇప్పటికి కూడా కాంగ్రెసు పార్టీలో చేరడానికే సిద్ధంగా ఉన్నట్లు చెబుతున్నారు. హామీల సంగతి అలా ఉంచి తన సోదరుడు కూడా కాంగ్రెస్ లో ఉండడంతో ఆ పార్టీలో చేరడమే మంచిదని ఆమె నిర్ణయించుకున్నట్లు తెలుస్తోంది. తెలుగుదేశం పార్టీ నుంచి బయటకు వెళ్తానని అనుకోలేదని ఆమె అన్నారు. బాధాతప్త హృదయంతో పార్టీ నుంచి వెళ్లిపోతున్నానని ఆమె అన్నారు. రెండు సార్లు తనను బలిపశువును చేశారని ఆమె తెలుగుదేశం నాయకత్వంపై విమర్శ చేశారు. తనకు సీటు ఇవ్వడానికి నాయకత్వంపై ఎంతో పోరాటం చేయాల్సి వచ్చిందని ఆమె అన్నారు.