'సత్యం' రాజుకు గుండెనొప్పి

హైదరాబాద్: చంచల్ గుడా జైలులో రిమాండ్ ఖైదీగా ఉన్న సత్యం మాజీ చీఫ్ రామలింగ రాజు గుండెనొప్పితో బాధపడుతున్నారు. ఆయనను సోమవారం సాయంత్రం హైదరాబాదులోని నిమ్స్ ఆస్పత్రికి తరలించారు. ఆయనను ఇంటెన్సివ్ కేర్ యూనిట్ (ఐసియు)లో ఉంచారు. ఆయనకు శస్త్రచికిత్స అవసరం పడుతుందని భావిస్తున్నారు. ఆయన ఆరోగ్యం నిలకడగా ఉందని నిమ్స్ వైద్యులు చెబుతున్నారు. ఆయనను మంగళవారం సాయంత్రం 4 గంటల 45 నిమిషాలకు నిమ్స్ తరలించారు. ఆ తర్వాత రాత్రి 8 గంటలకు ఐసియులో చేర్చారు.

రామలింగరాజు ఛాతీలో నొప్పిగా ఉందని సాయంత్రం 4 గంటలకు చెప్పారని, వెంటనే జైలు వైద్యుడు పరీక్షించారని, వెంటనే ఆస్పత్రికి తరలించాలని జైలు వైద్యుడు చెప్పాడని, దాంతో నిమ్స్ కు తరలించామని జైలు సూపరింటిండెంట్ ఎం చంద్రశేఖర్ చెప్పారు. మరో రెండు రోజులు రామలింగరాజుకు చికిత్స అందించే అవకాశం ఉంది. ఆయన గత కొద్ది రోజులుగా హెపిటైటిస్ - సితో బాధపడుతున్నట్లు సమాచారం. సాధారణంగా ఖైదీలను చికిత్స నిమిత్తం ఉస్మానియా ఆస్పత్రికి తరలిస్తారు. అయితే ప్రైవేట్ గా వైద్యానికి ఖర్చు భరించే శక్తిగలవారిని నిమ్స్ కు తరలిస్తారు.