వైయస్ ప్రమాదం: భాటియా తప్పిదం?

హైదరాబాద్: పైలట్ భాటియా తప్పిదం వల్లనే ముఖ్యమంత్రి డాక్టర్ వైయస్ రాజశేఖర రెడ్డి హెలికాప్టర్ ప్రమాదం సంభవించినట్లు వార్తలు వస్తున్నాయి. హెలికాప్టర్ ప్రమాదంలో రాజశేఖర రెడ్డితో పాటు భాటియా కూడా మరణించిన విషయం తెలిసిందే. హెలికాప్టర్ నడపడానికి ముందు వైద్య పరీక్షలు చేయించుకోవడానికి భాటియా నిరాకరించినట్లు చెబుతున్నారు. తన లోపాలు బయట పడతాయనే ఉద్దేశంతోనే ఆయన అందుకు నిరాకరించినట్లు భావిస్తున్నారు. పౌర విమాన యాన డైరెక్టర్ జనరల్ కార్యాలయం నిబంధనలను ఆయన పలు మార్లు ఉల్లంఘించినట్లు కూడా చెబుతున్నారు. ఇందుకు ఆయన డిజిసిఎ నుంచి నోటీసులు అందినట్లు చెబుతున్నారు.

భాటియా ఆపరేటింగ్ లిమిట్స్ ను దాటిన సందర్భాలు చాలా ఉన్నాయని అంటున్నారు. ఒత్తిళ్లను తట్టుకునే మాక్ రోటర్, ఆర్పీఎం వినియోగాన్ని గరిష్ట స్థాయికి భాటియా తీసికెళ్లినట్లు ప్రచారం జరుగుతోంది. తనకు డిజిసిఎ నుంచి వివరణ ఇవ్వాలని ఎప్పుడు కూడా నోటీసులు రాలేదని బాటియా గట్టిగా వాదించినట్లు చెబుతున్నారు. భాటియా లైసెన్స్ జూన్ 3వ తేదీతోనే ముగిసిందని, అటువంటప్పుడు రాజశేఖర రెడ్డి హెలికాప్టర్ ను నడపడానికి భాటియాను ఎందుకు అనుమతించారని కూడా అంటున్నారు. ముఖ్యమంత్రిగా ఎంఎస్ రెడ్డిని, శివకుమార్ లను పైలట్లుగా జూన్ 4వ తేదీ నుంచి నియమించినట్లు చెబుతున్నారు. అటువంటి సమయంలో భాటియా ఎందుకు హెలికాప్టర్ ను నడపాల్సి వచ్చిందనేది కూడా ప్రశ్నార్థకంగా మారింది.