వైయస్ చాపర్ పనికి మాలిందే

న్యూఢిల్లీ: ఆంధ్రప్రదేశ్ ముఖ్యమంత్రి డాక్టర్ వైయస్ రాజశేఖర రెడ్డి ప్రయాణించిన హెలికాప్టర్ ప్రయాణానికి పనికి రానిదని తెలుస్తోంది. తన తప్పును కప్పిపుచ్చుకోవడానికి భారత పౌర విమానాల రెగ్యులేటర్ కప్పి పుచ్చుకోవడానికి ప్రయత్నిస్తున్నట్లు తెలుస్తోంది. హెలికాప్టర్ ప్రయాణంలో వైయస్ రాజశేఖర రెడ్డి ఈ నెల 3వ తేదీన మరణించిన విషయం తెలిసిందే. పౌర విమాన యానాల డైరెక్టరేట్ జనరల్ (డిజిసిఎ) తన వైబ్ సైట్ లో మంగళవారం మార్పులు చేసింది. వైయస్ ప్రయాణించిన హెలికాప్టర్ వాలిడిటీ 2006 జులై 5 నుంచి 2010 జులై 5వ తేదీ వరకు ఉన్నట్లు వైబ్ సైట్ లో పేర్కొంది. తాజా పోస్టింగ్ సెప్టెంబర్ 3వ తేదీ పోస్టింగుకు పూర్తి విరుద్ధంగా ఉంది.

సెప్టెంబర్ 3వ తేదీ వెబ్ సైట్ పోస్టింగ్ లో ఆ హెలికాప్టర్ వాలిడిటీ 2006 జులై 5 నుంచి 2007 జులై 4వ తేదీ వరకు మాత్రమే ఉన్నట్లు ఉంది. వాలిడిటీ సర్టిఫికెట్ ను 1999 జనవరి 14వ తేదీన ఇచ్చినట్లు తాజా పోస్టింగులో తెలిపింది. సెప్టెంబర్ 3వ తేదీ పోస్టింగులో మాత్రం దాన్ని 2006 జులై 6వ తేదీన ఇచ్చినట్లు ఉంది. వైయస్ రాజశేఖర రెడ్డి హెలికాప్టర్ అదృశ్యమైన రోజు సెప్టెంబర్ 2వ తేదీన డిజిసిఎ హెలికాప్టర్ ప్రయాణానికి పనికి వచ్చేదేనని ప్రకటించింది. పరస్పర విరుద్దమైన పోస్టింగులపై మాట్లాడడానికి డిజిసిఎ నిరాకరిస్తోంది. మీడియాతో మాట్లాడేందుకు తమకు అనుమతి లేదని జాయింట్ డైరెక్టర్ జనరల్ (దర్యాప్తు) ఎకె చోప్రా అంటున్నారు.