రెండు రోజుల్లో రాష్ట్ర నేత: సోనియా

న్యూఢిల్లీ: దివంగత నేత వైయస్ రాజశేఖర రెడ్డి కుమారుడు వైయస్ జగన్మోహన్ రెడ్డిని ముఖ్యమంత్రిగా చేయాలని రాష్ట్ర పార్టీ పార్లమెంటు సభ్యులు కాంగ్రెస్ అధ్యక్షురాలు సోనియా గాంధీకి విజ్ఞప్తి చేశారు. పార్టీ రాష్ట్ర ఎంపీల ఫోరం కన్వీనర్ పొన్నం ప్రభాకర్ నేతృత్వంలో ఐదుగురు ఎంపిల ప్రతినిధి బృందం బుధవారం సోనియా గాంధీని కలిసింది. ప్రజాభిప్రాయాన్ని సోనియా గాంధీకి వివరించినట్లు పొన్నం ప్రభాకర్ చెప్పారు. రెండు రోజుల్లో ముఖ్యమంత్రి ఎంపికపై నిర్ణయం తీసుకుంటామని సోనియా తమతో చెప్పినట్లు రాయపాటి సాంబశివరావు సోనియాతో భేటీ అనంతరం మీడియా ప్రతినిధులతో అన్నారు. తమ అభిప్రాయాలు విన్న తర్వాత ఆలోచిస్తామని సోనియా అన్నట్లు ఆయన చెప్పారు.

పార్టీ శాసనసభ్యులు, ఎంపిల అభిప్రాయాలే కాకుండా పార్టీ కార్యకర్తల అభిప్రాయం కూడా తాము సోనియాకు చెప్పినట్లు తెలిపారు. వైయస్ రాజశేఖర రెడ్డి కార్యక్రమాలను ప్రజల్లోకి తీసుకుని వెళ్లే నేత రాష్ట్రానికి కావాలని చెప్పినట్లు తెలిపారు. అనుభవం గురించి ప్రస్తావన రాలేదని కావూరి సాంబశివరావు చెప్పారు. వైయస్ రాజశేఖర రెడ్డి అమలు చేసిన కార్యక్రమాలను కొనసాగించే నేత కావాలని, వైయస్ కుమారుడు అందుకు తగినవాడని తాము చెప్పామని ఆయన అన్నారు. తాము చెప్పిందంతా సోనియా విన్నారని, ఆమె ఏమీ చెప్పలేదని ఆయన అన్నారు. సోనియా గాంధీని కేంద్ర మంత్రి ఎస్ జైపాల్ రెడ్డి కూడా కలుసుకున్నారు.