వైయస్ చాపర్ కాక్ పిట్ రికార్డర్ ధ్వంసం

హైదరాబాద్: దివంగత నేత వైయస్ రాజశేఖర రెడ్డి ప్రయాణిస్తున్న బెల్ - 430 హెలికాప్టర్ లోని కాక్ పిట్ వాయిస్ రికార్డర్ (సివిఆర్) పాక్షికంగా ధ్వంసమైనట్లు తెలుస్తోంది. రికార్డర్ ను విశ్లేషించడం ద్వారా ప్రమాదం జరిగే సమయంలో హెలికాప్టర్ లోని వారు ఏం మాట్లాడుకున్నారో విశ్లేషించడానికి అవకాశం ఉంటుంది. అయితే అది పాక్షికంగా దెబ్బ తిన్నందు వల్ల వారి సంభాషణలను విశ్లేషించడం కష్టమని ఉన్నతాధికారులు రాష్ట్ర హోం మంత్రి సబితా ఇంద్రారెడ్డికి తెలిపినట్లు సమాచారం.

సివిఆర్ ను ఇక్కడ విశ్లేషించడం కష్టమైతే అందుకు దాన్ని అమెరికాకు పంపుతామని పౌర విమాన యానాల డైరెక్టర్ జనరల్ కార్యాలయం ఒక ప్రకటనలో తెలిపింది. అమెరికాకు చెందిన యూనివర్సల్ ఏవియోనిక్స్ సిస్టమ్స్ కార్పోరేషన్ సివిఆర్-38 సాలిడ్ స్టేట్ మోడల్ ను తయారు చేసింది.