యుపిలో ఐఎస్ ఐ ఏజెంట్ అరెస్టు

లక్నో: ఉత్తరప్రదేశ్ లోని కన్పూర్ జిల్లాలో ఐఎస్ ఐగా అనుమానిస్తున్న ఒక వ్యక్తిని అరెస్టు చేసినట్లు ఉగ్రవాద నిరోధ బలగం (ఎటిఎస్) అధికారులు శనివారంనాడు చెప్పారు. లక్నోకు 80 కిలోమీటర్ల దూరంలో గల భవుటీలో ఇంతియాజ్ అలీ అనే వ్యక్తిని అరెస్టు చేసినట్లు వారు తెలిపారు. అలీ నుంచి ఉత్తరప్రదేశ్ లోని వివిధ జిల్లాల్లో గల రక్షణ సంస్థలకు సంబంధించిన పత్రాలను స్వాధీనం చేసుకున్నట్లు చెప్పారు.

ఐఎస్ఐ శిక్షణలో భాగంగా అలీ నవంబర్ లో కరాచీ వెళ్లినట్లు, ఆ తర్వాత ఫిబ్రవరిలో తిరిగి వచ్చి ఆగ్రా,ఝాన్సీ, మీరట్ ల్లోని కంటోన్మెంట్ కు సంబంధించిన సమాచారాన్ని పాకిస్తాన్ కు అందిస్తున్నట్లు వారు వివరించారు. అలీని అరెస్టు చేసిన విషయాన్ని శాంతిభద్రతల అదనపు డైరెక్టర్ జనరల్ ఎకె జైన్ ధృవీకరించారు. అయితే ఇతర వివరాలు వెల్లడించడానికి ఆయన నిరాకరించారు.