ఇది వైయస్ విజయం: జగన్

హైదరాబాద్: దివంగత నేత వైయస్ రాజశేఖర రెడ్డి చేపట్టిన అభివృద్ధి కార్యక్రమాలే శ్రీకాకుళం జిల్లా టెక్కలి శాసనసభ ఉప ఎన్నికలో ప్రజలు కాంగ్రెసు పార్టీకి పట్టం కట్టారని వైయస్ జగన్మోహన్ రెడ్డి అన్నారు. టెక్కలిలో తమ పార్టీ అభ్యర్థి కొర్ల భారతిని 7,173 ఓట్ల తేడాతో గెలిపించినందుకు ఆయన ఓటర్లకు కృతజ్ఞతలు తెలిపారు. సోనియా గాంధీ నాయకత్వం పట్ల ప్రజల విశ్వాసానికి ఈ ఫలితం నిదర్శనమని ఆయన సోమవారం మీడియా ప్రతినిధులతో అన్నారు. గత ఎన్నికలో కన్నా ఈసారి మెజారిటీ పెరిగిందని ఆయన అన్నారు.

కాంగ్రెసుకు ప్రజల అండదండలున్నాయనడానికి టెక్కలి ఉప ఎన్నిక ఫలితం నిదర్శనమని ముఖ్యమంత్రి కె.రోశయ్య అన్నారు. ఈ విజయాన్ని దివంగత నేత వైయస్ రాజశేఖర రెడ్డికి అంకితం ఇస్తున్నట్లు రెవెన్యూ మంత్రి ధర్మాన ప్రసాదరావుతో పాటు భారతి చెప్పారు. వైయస్ రాజశేఖర రెడ్డి సంక్షేమ, అభివృద్ధి కార్యక్రమాలే తనను గెలిపించాయని భారతి అన్నారు. తాను ప్రజలకు ఎల్లవేళలా అందుబాటులో ఉంటానని ఆమె చెప్పుకున్నారు.