మేం కలిసే పనిచేస్తున్నాం: ఆనం

హైదరాబాద్: ప్రభుత్వాన్ని అప్రతిష్టపాలు చేయడానికి ప్రతిపక్షాలు అనవసర రాద్ధాంతం చేస్తున్నాయని మంత్రి ఆనం రాంనారాయణ రెడ్డి విమర్శించారు. ప్రభుత్వం పనిచేయడం లేదని ప్రతిపక్షాలు చేస్తున్న విమర్శలను ఆయన బుధవారం మీడియా ప్రతినిధుల సమావేశంలో ఖండించారు. మఖ్యమంత్రి కె. రోశయ్య నాయకత్వంలో తాము అందరం కలిసే పని చేస్తున్నామని, మంత్రులందరం కలిసి కట్టుగా పని చేస్తున్నామని ఆయన చెప్పారు.

దివంగత ముఖ్యమంత్రి డాక్టర్ వైయస్ రాజశేఖర రెడ్డి తలపెట్టిన అభివృద్ధి, సంక్షేమ కార్యక్రమాలకు ఎటువంటి ఆటంకం జరగడం లేదని ఆయన అన్నారు. ముఖ్యమంత్రి రోశయ్య పాలన సమర్ధంగా సాగడం లేదని తెలుగుదేశం పార్టీ నాయకుడు మైసురా రెడ్డి విమర్శించారు. పాలనా వ్యవహారాలపై ఇతర ప్రతిపక్షాలు కూడా విమర్శలు చేయడం ప్రారంభించాయి.