జగన్ హైకమాండ్ ను వింటారు: కెవిపి

హైదరాబాద్: ముఖ్యమంత్రి పదవి విషయంలో దివంగత నేత వైయస్ రాజశేఖర రెడ్డి కుమారుడు వైయస్ జగన్మోహన్ రెడ్డి కాంగ్రెసు అధిష్ఠానవర్గం మాట వింటారని రాజ్యసభ సభ్యుడు కెవిపి రామచందర్ అన్నారు. మంత్రి వట్టి వసంతకుమార్, తిరుమల తిరుపతి దేవస్థానం (టిటిడి) మాజీ చైర్మన్ కరుణాకర్ రెడ్డి బుధవారం ఉదయం కెవిపి రామచందర్ రావును కలిశారు. తాజా రాజకీయ పరిస్థితులపై వారు కెవిపితో చర్చలు జరిపారు. అధిష్ఠాన వర్గం అర్హుడని భావిస్తే వైయస్ జగన్ ముఖ్యమంత్రి అవుతారని కెవిపి అన్నారు.

కెవిపి రామచందర్ రావు మాటలను బట్టి తిరుగుబాటు చేయాలనే ఆలోచన జగన్ వర్గంలో లేదని తెలిసిపోతోంది. అయితే, అధిష్ఠాన వర్గాన్ని ప్రభావితం చేయడానికి ఏం చేయాలనేదే వారి ముందున్న కర్తవ్యంగా తోస్తోంది. అధిష్ఠాన వర్గం నిర్ణయానికి వేచి చూసే ధోరణినే ఈ వర్గం అనుసరించాలని భావిస్తున్నట్లు అనుకోవచ్చు. వారం రోజుల పాటు పార్టీ అధిష్ఠాన వర్గంతో లాబీయింగ్ నెరిపిన కెవిపి ఇక తన లాబీయింగ్ కు ఫుల్ స్టాప్ పెట్టినట్లే భావించవచ్చు.